ءاغد ءيرار ربي لعاقل زغ ءيموريكي

ءاغد ءيرار ربي لعاقل زغ ءيموريكي

ءاغد ءيرار ربي لعاقل زغ ءيموريكي

ءاو كان ؤر نتابعا شاهوا د لغرضي

ءيجلاغ ربي لارزاق نك زود لباز

ءيضفارن صيد ءار داسن جلون ءيقنضي

كرا يكات تمازيرت نكات س ءيموريكي

نستارا تنت نزرا مايكان لجيدي

ءيغ كيغ ءيرا مولانا ءانك ءامزواكي 

نصبر بزيز ءار كيغ نزرا سيبابي

كايكات لباب ءيس تن كيغ نورمتندي

ؤر نوفي ما يوفن ءالاحباب غيكادي

ءيغ نيت نطاف لفلوس ءانك ءاسبابي

لحرام ءيرا تنش مقار نيت نتوبي

ءيغ را نزنزءي لخلق ءارت نتكنادي

ءيغ تلا حاجة س خمسين ولا بودي

ءاس نيت نكال ءار تلا س خير الله

نورم ءافلاح ءاوكان نكرزي

نختار ءاكال نختار ءيكر ؤلا ءامودي

ءيغ تنتن كرز ءبين ؤنزار ءيغابي

ؤر نوسي تاقايت ءيويغ كا ءانكيدي

نسغ ؤلي نيغ ءاداغ نتكل على الله 

نومز ءامكسا ءاراس ناكا كرا لحسابي

كيكات ءايور لفضل ءاراد كيس ءيشيضي

ءيكسا يا واس ءيجرو كيس خير الله

ءيرزا يان ءيقلب يان ءيش رشن كوزي

نيغ داغلخير لوقران ءاغداك ءيكيزي

ءيغ فلاغ ءيتوب ربي ءانك لفقيهي

ءيغ ياد نموت ءيحتام ءانك ؤساعيدي

يامزيي بابا ءيكلين ياوييدي

ءار تيمزكيدا سدوقرن س لفقيهي 

لي غدي فوغ ءيناس ميا ن ضيف الله

ءاراو ءينو ريغ كيس ءاد غرن ءيتوبي

لوقران لي دي ءيكزن ف نبي محمدي

طالب ءيكلين ءيتياقن فكانييدي

لقلوم د تالوحت ءارنغ ءيسلمادي

ءيدليف ءاساك ءيزوار ءيملاييتندي

نك خير الله نفهم كولو لحسابي

ؤلا لوقران نفتا كيس نيوريدي

ءار ” ولا تجادلوا أهل الكتاب ”

ءاغ تنت نفوغ نبلاك داغ س ءيموريكي

نسكر ريباب ؤر كيس نفهيم ءيضربي

كاغ دار مدن تاضصا ءين غ نتلعابي

نغاغ ؤلينو صبرغ نصبر بزيزي

ؤر داري سوق ءيغ كيتي طصا لحبابي

يا ناغ ءينان ءارا ءامارك لجديدي

ءار دي تينيغ ءاقديم ءارتنسخلاضي

غايد ءيموريك ؤمنتاك د ؤنشادي

وي لحاج بلعيد ءاس داك نبدا لحسابي

ءايلاغ ءا تنضامغ ءامارك لجديدي

ؤلا ريباب ءار كيس نسكار لهندي

كاغ دار مدن لعدو ءينغ نتلعابي 

=====================الحاج محمد ءالبنسير