يات تنضامت ن لحسن أجماع د حماد ءوطالب ءامزوضي :

يات تنضامت ن لحسن أجماع  د حماد ءوطالب ءامزوضي :

ءاجماع :

وا باب العاقل راداك نيني سلاياغي

ءيغاك ءيفكا ربي دنيا تسكرت لخيري

ءيما صاحت ءار تيدو ءيوانا تنت ءيلاني

راكن ياسي وافود نك ءاركن ؤراسيني

وا دونيت ءيجديكنس ؤر سفرحن ياني

مقار ءات بنغالن غ ؤرتان ؤلا ءاغاراسي

را سول كين ءاساغور غ ؤريقاما روحي

كولو مايكان ءازنبو ءاسول ءيقاري

وا كولو ءيك ءاحشموض ءانرار ءاسيس ءيقلني 

ءوطالب:
ءاجماع هان سفلداغ ءي كلو ما تنيتي

ءيساناغ غيدا تريت سواوال نكي

غيكاد ءاتكيت ءاتودرت كويان ءيكاتنتي

ءامان ءاسغار ءيبيدن ف واكال ؤر ءيموسي

دونيت ءاك ؤر ءيتاجان يان ؤلا طمع نسي

ؤرا سار كسن كادا ءيفاسن ف لمنشاري

ءا كويان س ماني س لدين ءيعمر ؤغاراسي

يان ءيشيب يان حرا دارس ميمن ؤساني

ءيكا نيت سول شباب ؤرتا ءيسكر تاكاتي

ؤراك ءيسن ءيسيراد ءيكنو ياسي ءاكورايي

ؤلا سن ءازنبو ءيسيرا ياسوسي

ءاجماع :

ءيغ ءيكا كرا واد مزيكن ءيغ حرا لولاني

ؤراساك كيغ لعيب ؤر فلاس ءيلي ياتي

ءادوكان يازوم ءيبايناس كرا تينيغي

ءايان ءيزرين لحرب ن زمان ءاس نساوالي

ءيلوح ءيزري د منيد نس ءيسن ماني راني

ءيغ ءيسوق يان ءيماغ ءايزر ماتي خاصاني

ءادور ءيخوو سوق ركلن فلاس ءيفلواني

ءيبيد ؤسدرم ن تيدات كولو خاصاني

لمال رؤسول ءسوكير يات ءيغاك لاني

ءوطالب :

ءا غواد ءيتوصون ميدن فل ءييخفنك ءيميكي

ءا لوصيت نون ءاجيت راستي تيريتي

ءا تهالايت كيسنت ءادايك ؤر تفغا ءافوسي

ءا دور ءيبيد ؤزمز نس ؤر تيت ؤفيتي

ءارا ما نكا نكي ديك غار ءيسوق ناغي

ؤري ءيكي زمان ماديتماغ راك ءيشمتي

واخا كيس تلديت ءيزيكر راكا ترميتي

ؤراداك د ءيفل مندو ريحات غماس ؤفوس نكي

ءاجماع :

ءاوال ءيغ تنيغ ءازنغت ءاييلي ف لحاقي

ءا وانات ءيران ءيغيت وانا توريريني

ؤراس نكي بزيز ءيسكا نكي ساولغي

ؤراك ءيحتاجا باب لاقل لوصياتي

لاجال ءاتكيت ءاتودرت وانا مي كملني

ؤسان ءاد ؤر ءيسيكيل ماني سا تاكيني

ءوطالب:

ءيمنعا زمان ءاد ءاكيس ءيشور ياني

وخا تادرت ءيكايو ءار كا ترميتي

ؤر ءاوا ءيهنا مندون ويلي قنعانيني

هان لقويت لحساب ءاركا سحفوين ياني

ءا كادا نيان ءيماضي ؤتن غار ءا فوس نسي

ءار ءيتيري ءاست ءيد ءيسمون ءيفلتين ءاكي

ءاجماع :

ءيغير ءارك ءيسيويد ءيخفنك تياقن نيتي

ءالات ءيخف نك ءيني عيش ءيوانا تيراني
تينيتاس ءيلعتوبات ءاتوت ءاقلالي

ءيغ ؤر ءي سيلي لحساب رايحفو واوالي

ءيغ ؤر ءيفريس ؤكلزيم را ءيكشم تكاتي

ءا تيد ؤتن ءيحدادن سنيت ءيفرس مليحي

ءوطالب

ءاجماع ءاودي هاتي تسرميتاغي

ءاداك نصبر بزيزنو نطفار لخاطر نوني

ءيغاك نتعراض ءيكوت ماغ ءيران نفوغي

ءا باراكا غ لحاديث ءان لي توسيتي

ؤراك ءيسفلد بنادم وخا تي طوساتي

ءا لوصيت ءيلا غ ميدن ماست ؤريريني

ءاجماع :

وا ناك ءيتنصاحن زونك ؤتن س ؤكورايي

ؤريكي صبر بزيز ءاكن ءاك ؤر نسيحيلي

ؤسينانغ ؤكان ءيضار نينو غ ؤغاراسي

ؤراك رزمغ لباب ؤرتن فلاك نقيني

ءيغ ؤر ءيقبيل ءيلاهي لحسنات ن ياني

مقار ءابدا تعبادن كرا تكا دونيتي

ءيغ ءيكا كرا وين لجنت راكيسنت ءيليني

ءا واخات كولو كرهان ويلي تورءيريني

ءوطالب:

لحاج ءيغ ساولغ ءاكيون ؤر ءيغاما ياتي

ءاوالاد كريديك كا سنرا ءات نفرني

ءا جور نخلض لوز ءيمحيري د تيميميني

كولو ماني غيلا زور را ت ءيسيتي ياني

نحرك رسوم نس ءادور غامان ءيغ نموني

ءا ييلي صبر غ كري ديك ءيغاسن توفيتي

ءيلي غايت ءيموريك ءيغ نلا غ ءيسوياسي

ءاتيتي لحسادا كيتنغ ءينا غ نموني

ءا دور نفال لباب نك غيلي تور ءيليني 

ءاجماع :

وا ءاحيانا ، ءان ءيتابعا يان ءيك ؤلوقتي

وا ءاحيانا ، ءاد ؤر ءيتجماع د ءيباليسني

وا ءاحيانا ، ءاوال ءيشوان د واد ؤريشوين

وا ءاحيانا ، ءاح منشك ءاخ مزارايني

وا ءاحيانا ، ءا وا نا ؤر ءيسيويد لمونكر

وا ءاحيانا ، ءا تيسانت ئيس ؤريكا ءامومني

وا ءاحيانا ، ءا تامونت ن غيكاد رمينتي

وا ءاحيانا ، لغاراض كاد تحوبو ميدني

وا ءاحيانا ، واناد ءيفوغ لغرض موتني

وا ءاحيانا ، ءيكيت ءاركاز نغ ءيكا لونتي

ءوطالب:

وامون ءاسلام ءينو د ؤماركي

ءيناغ لان لاحباب لكمتني

ءاريغ ءانسلم ف ميدن كولوتني

ويد مزين ؤلا ويد مقورني

ءا سلمغ ف لموحيبين ءينوي

ءا وان ؤر نلكم س ؤضار ءينوي

ءاجماع ءاوالي دا مونغي

ياك ءامود ياد نغيد ميميني

ءاكالاد كولي ءيكا وينغي

ءا هاد ءيكران ءينو ها وينكي

ءاد ءيكمل ربي ءانمكر صابتي

ءا كولو ءيسلم ربي ماد ءيموني

ءا شيشاون ءيلاغيد لخاطري

ءاياسيف ن ءايت هادي فرحني

ءا ياباينو غصاد ءيعمري

ءالوح ءيزري ماغيد ءيموني

سلم ف ءايت ءيموريك ءيناسني

ءا كرزايت ءانمكر صابتي

ءا تامونت ءاتحتاجا لوقتي

ءيما تيبضيت ؤر نكا وينسي

ءاجماع :

ءا يوطالب مافاون كيغ ءاسمون ؟

ءاريغ ءايي تعاون نعاونكن

ءادور نتغيار ءيكويانغي

ءا وال ءيغ سول ءيلا غ ءيمينكي

ءا فرنات كيي د ؤكايونكي

ءا فاد ءاسرس ءيتنضام ءيلسي

ءوطالب:

ءا جماع هان ءاودي ءاوكان

حوشات تيليت د ؤكايونكي

ءيغ ؤر نفسير ءيزض نفرنتي

ؤرا تن زضاغ ؤلا كرغاسني

ءا وال ءيغ ؤراتيد نشاشكي

ؤراتيد ساكاغ ءيكي ءيلسي

هان ؤر ييد ءيشاض ءيمينوي

ءاجماع :

هان لخاطر ؤريلي دار ميدني

ءا كيوان د ماداس ءيضين ءيخفي

لجفاف د لهم ن بو تاروا

ءاراس ءيراز ءافوس ءيفلتني

ؤلا باب ن ءيموريك ءيمرتي

ؤراس ءيفل ؤزمزاد لفكري

ءوطالب:

أجماع عول ف ؤكايونكي

ءاترس ءيغ كيك ءيلا داواتني

مامي راد تعاوادت لهمنكي...؟

ءيليغ ءيرزا ؤكوك نسنتني

ءا ولي ءيكان ءيما زالن نسي

ءا كولو ءيكان سباب ءيلوقتي

ءايليغ تلكم غيدا لكمنتي

ءاينا سكرن سربون ءا غتي

ءاجماع :

نكي حمدخ ءيربي هنا غنيت

ؤر نتوت س لباروض ؤلا رصاص

ءاريغ ءايك ءينيغ ءيغاك نغزان

ءا وانا ءيران ؤكوك نس س ؤملال

ؤلاه ؤر سار ءيزوزور ءانرار

ءيغرضاين ءايقازن تانسا

ءا مان ءاركا تفوغن س لخلا

ءا غيلي تن ءيران ءيكاميتني

ءوطالب:

ءافوس ءيخلضن تيد ءيفرني

ءا كين ءيركان ءي تيد ءيغوسني

رزين ءيسغارن لي دي ءيخلفني

ءا كيس ؤر تيريت تيد ءيميميني

ءا سمونات كيسن ءاكايونكي

ؤر ءيفك ءي ؤزرك ءيفلكني

ءاجماع :

ءاسمد ءيصبر وياض ءارايسي

ءيغاك ءيسغي بزيز ءيفيفلي

راد ؤكان ييلي ف ءيكي ءيلسنك

ءا كار ءاسمون ءيغ ءيكا وينكي

را توكان تربوت ءيغاك ءيرمي

ءيغ ءاوا تريت لخبار ءيصحان

ءا غيلي بنان ميدن هان ءيخلا

ؤر ءيكيس ءاسميد ءيتاروا

ءيخاصايغ ءاداغ ندوس ءيلساس

ءا داخ نبنو لبروج ءيصلحني

ءوطالب:

ءيلاتن ءالحسن دي ماسني

توت ؤزال غيكلي كيك نسني

تاداليت ءاستيد ؤر نفلي

هيا نشكاد س غيد ءانتلي

ءا والنك هان سفلدا غاسني

ماراك ءيبنو لبروج ءيصلحني ؟

ءيفرغ لساس ءيبنايني

ءا كار لخدمت تكسا ءاكايونسي

ؤرجو ءيمون صدل د ءيماسني

ءيسن ؤر فلن غويد ءيفيسني !

ليغن كولو نركل صابتي

ءاكولو قصادنتيد ءيفاسني

ؤسيناك غايلي كيس نفلي

ءاجماع :

نكيديدك ءارايبيد ءيسيعري

ءينا غ ءيكنا ؤبريد نسمسي

ءاداسور حاضرن ءيباليسني

ءادك ؤر تنيت ءيهنا لحال

ءاكوراي وادا فيضر فاقناس

مقار ءاور ءالان ءيهولتني

ءيغ رؤ ءيصلح بنادم س ءيخف نس

ءا مان ءاسدرم ءاراداك ءيقني

ءايان ؤر يوسين لهم ءينوي

مامنك ءاس ران ءان نربو وينسي ؟

ءوطالب:

ءاد ؤكان ءيرحم ربي لوقتي

ءيكاغ لعوانس ءيكاونتي

ءيما غويد زييرن ءيزاكارني

ؤفان ءاغاراس ءيباناسني

ءاوالايني تهويد ءالوقتي

راسول لكمن غيدا غيقني

تاوالانسن راتند تلكمي

ءيميك ءايغامان ءاداكوفني

فوغاوا تسوقت ف ؤكايونكي

يان ؤر ءيصليحن ترزمتاسني

ءاداك ؤر تربوت لهمنسي

ءا مان لباب ءاراداك ءيقني

ءيقادا تن كيسن ؤكايونسي

ءيراد ءيسحارو تضورينسي

ءاجماع :

أوطالب راداك ءينيغ يا ؤجموعي

ءيغن سرك نساول تراريد ءامزوغي

ءا كايكات ءاوال حتاجان س لجوابي

ءافوس غ ؤفوس ءار نساوال ءادور نزربي

لجمهور ءيلا كيس ءيريفي ن ءيموريكي

وا كاند ءيمزكان ءيحوبا ءايك ءيسفليدي

لحورما نون ءادور ءيكرز ءيلس ناغ لعيبي

ءا دور نفل كار ءيواليون غ تاسوتادي